冥想小貼士一我冥想得夠唔夠好？

相信唔少人啱啱接觸靜觀冥想（僅指 Mindfulness Meditation，下文亦同）都會懷疑自己做冥想做得好唔好。「我清空唔到自己嘅腦袋！」、「我進入唔到果個狀態！」係好多初學者嘅心聲，但事實上，之所以會出理現依啲諗法，或多或少同社會對冥想嘅誤解有關。

要破除依啲誤解，首先要知道「冥想」嘅目的係咩。做冥想，係為左培育一種活在當下、覺察心靈而不加批判嘅狀態。其中一個重點，就係如實地留意自己心靈。如果係覺察到自己嘅心好多雜念，集中唔到－咁依份覺察已經係冥想最關鍵嘅一部份。

咁樣睇，又有何「清空腦袋」或者「進入狀態」嘅需要呢？事實上，每個人做冥想都會有好唔同嘅體驗：有人會覺得好寧靜；有人會留意到自己嘅思緒一刻都停唔到落嚟。但無論你係邊種，都係對心靈嘅體會，無所謂優劣之分。

當然，就算你知道左原理，你可能下次做冥想分咗心都會照常怪責自己，因為人嘅思維模式係日積月累而成嘅，未必一時三刻可以改變到。所以，下次不妨連怪責自己依樣野本身都覺察一下 － 因為意識到自己會怪責自己都係屬於洞察心靈嘅一種。咁樣做，久而久之正念嘅種子就會喺心中萌芽 － 自責、分心依啲情況依然會出現，但係佢地對我地嘅羈絆會愈嚟愈少。