立即報讀《企業培訓師的溝通技巧揭秘》線上課程
今時今日如果我哋走去搵輔導員傾計嘅話，通常會面對面咁坐係兩張櫈上面。一方敞開心扉，另一方就會對你講嘅嘢尊重、接納，就好似個朋友咁。
咁樣睇落好理所當然，但係原來係啱啱開始有心理治療嘅時候，多數嘅治療方式都唔係咁嘅樣。 例如喺佛洛伊德(Sigmund Freud)嘅精神分析傳統入邊，「病人」會瞓係張長梳化上面，心理治療師會坐係一個病人睇唔到佢嘅角度。治療師通常會以比較高嘅姿態對佢嘅「病人」，冷靜咁分析問題出現嘅成因，同埋極少會同病人分享自己嘅嘢(self-disclosure)。
榮格與佛洛伊德
係咪同而家心目中嘅心理治療好大分別呢？箇中轉變嘅原因，就不得不提同佛洛伊德亦敵亦友嘅榮格（Carl Jung)。係榮格嘅職業生涯初期，好多野都係跟當時權威嘅佛洛伊德。直到後來佢發展出自己嘅一套，對當今心理治療影響深遠。榮格相信，心理治療係社交嘅一種，受治療嘅人唔係一味被動咁接受治療師嘅指示。而係好似一個聯盟（同早時今日講嘅therapeutic alliance有不少相似之處）咁，就同一個問題協商、合作。所以佢唔用長梳化，而係搵兩張櫈同受治療嘅人對坐。咁樣做，根基嘅哲學就係將講嘢同聆聽嘅人同樣建立喺「大家都係人」嘅基礎之上。例如榮格本人就講過：
「一個人嘅精神問題，係一啲額外嘅野。本質上，佢應該被視為一個正常人，我哋要正常咁同佢相處。」
榮理的心理治療哲學
榮格對有需要嘅人嘅態度，好值得我哋學習。好多受過榮格治療嘅人，話佢係一個誠懇、有禮、溫柔嘅人，最重要係佢唔會擺出一副高高在上嘅姿態，佢自己講過：「只有受過傷嘅醫生先醫到人」。有啲精神病人會同佢講啲表面上好荒謬嘅嘢，榮格唔會即刻話：「依啲嘢好唔合理」，反而會好有耐性咁聆聽，試圖搵出點解佢哋會抱持依啲信念。聽完成個故事之後，依啲「荒謬」嘅信念就唔會再荒謬，反而喺果個人嘅世界入面好合理。
我哋每一個人都有自己嘅世界觀同信念，難免會同其他人有衝突。所以聆聽緊嘅時候，不妨學習榮格不批判（non-judgemental）嘅態度，就算聽落幾唔合理、幾唔符合自己嘅價值觀，都試吓用心去理解、明白。到對方講完嘅時候，再坦誠咁提出自己嘅疑問。咁樣你會發覺，無論係自己同對方，都會喺用心聆聽之間成長好多。
參考資料：Jung: A very short introduction, Chapter 6: Therapy
